【明報專訊】政府以浪費公帑為由，諗住用遞補機制取代立法會補選，近日網上熱傳譚玉瑛姐姐喺無綫節目《放學ICU》嘅其中一個環節，佢以Miss Tam嘅身分教班細路，如果班長有空缺，係應該重選，唔應該由上次選舉第二高票嘅同學遞補，咁樣先公道。 有人將片段放上YouTube，題為《譚玉瑛教你一個連小學生也能明白的道理(林公公聽着)》。喺段片中提到班長因為轉校離任，Miss Tam話要再選過，上次拎第二高票嘅同學就話﹕「仲要選？咩唔係由上次第二高票嘅人當選咩？」Miss Tam話﹕「咁樣梗係冇咁好啦，你知唔知呀，每一次參選時候，每一個同學諗法都有唔同，結果咪有唔同囉。所以呢，再選過係最公道啦。」 Emily問過譚玉瑛姐姐，佢話對呢集有少少印象，係今年內拍攝嘅，但就唔記得同遞補機制有冇關。譚玉瑛姐姐話劇本係監製曾廣平佢哋開會傾出嚟嘅，可能係揀一啲社會熱門話題啩，佢自己都有留意到早排遞補機制風波，又話按道理梗係補選好啲啦。 YouTube仲有另一段《放學ICU》，係選班長嘅續集，內容係話賄選係唔好嘅，都有唔少人睇過。 無綫外事部副總監曾醒明就話《放學ICU》會有埋通識功能，會因應社會熱門話題，等小朋友透過比較活潑嘅方式學習。
|
| |
| |
